Presidentja e vendit Vjosa Osmani ka përkujtuar masakrën e 3 dhe 4 shkurtit të vitit 2000 ndaj shqiptarëve në Mitrovicën e Veriut, e cila ndryshe njihet dhe si “Nata e Tmerrit”.
“Dhjetë qytetarë shqiptarë të vrarë, në mesin e të cilëve fëmijë, gra e pleq nga banda të armatosura serbe, 25 të plagosur ndërmjet 3-4 shkurtit të vitit 2000, sikurse edhe 1664 familje të dëbuara me gati 12 mijë anëtarë nga pjesa veriore e Mitrovicës, mishërojnë kujtesën dhe nevojën për drejtësi”, thuhet në njoftimin e Presidencës.
Tutje thuhet se në “23-vjetorin e ditëve të tmerrit në këtë pjesë, thirrja për drejtësi është nderim për të vrarët, të plagosurit dhe të dëbuarit”.
“Qoftë i përhershëm kujtimi për viktimat e drejtësia synim i vazhdueshëm deri në vënien e autorëve para përgjegjësisë!”, vijon njoftimi.