Presidentja e Kosovës, Vjosa Osmani ka reaguar në lidhje me plagosjen e dy personave në Shtërpcë, të premten e 6 janarit.
“Plagosja e të rinjve 11 dhe 21 vjeçar në Shtërpcë është akt i patolerueshëm, ndaj autori duhet të vihet para drejtësisë”, thuhet në njoftimin e Zyrës së Presidencës.
Tutje thuhet se institucionet e Kosovës janë të përkushtuara maksimalisht që qytetarëve pa dallim etnie t’u ofrohet ambient i sigurt dhe i qetë.
“Të plagosurve ju dëshiroj shërim të shpejtë, ndërkaq ftoj organet e sigurisë që rastin ta trajtojne urgjentisht e sipas ligjit”, thuhet mes tjerash në njoftimin e Presidencës.
Në lidhje me këtë ngjarje ka reaguar dhe ministri i Mbrojtjes, Armend Mehaj, i cili ka njoftuar se i dyshuari për plagosje në Shtërpcë është pjesëtar i Forcës së Sigurisë së Kosovës.
“Me rastin janë duke u marrë organet e sigurisë dhe drejtësisë. I njëjti do ta trajtohet edhe sipas rregulloreve dhe ligjeve që kemi në fuqi në Ministrinë e Mbrojtjes dhe Forcës së Sigurisë”, ka shkruar Mehaj.