Presidentja e Kosovës, Vjosa Osmani, të premten ka pritur në takim një delegacion nga Komisioni i Venecias, i përbërë nga raportuesja Grainne McMorrow, zëvendëssekretari Schnutz Dürr, si dhe shefi i Zyrës së Këshillit të Evropës në Kosovë, Frank Power.
Sipas njoftimit të Presidencës, në këtë takim, Osmani ka shpjeguar nevojën e procesit të vetingut në sistemin e drejtësisë të Kosovës, me ndryshimet e nevojshme kushtetuese dhe ligjore.
Po ashtu, e para e vendit, ka theksuar se një proces i mirëfilltë dhe profesional i vetingut është jetik për ta forcuar sundimin e ligjit, si dhe për të garantuar integritetin, efikasitetin dhe profesionalizmin e sistemit të drejtësisë.
“Si i tillë, procesi i vetingut ka për synim forcimin e cilësisë së sistemit të drejtësisë, i cili ndikon drejtpërdrejtë në përmirësimin e jetës së qytetarëve të Republikës së Kosovës”, thuhet në njoftimin e Presidencës.
Gjatë takimit bëhet e ditur se është diskutuar për marrëdhëniet dhe bashkëpunimin në mes të Kosovës dhe Komisionit të Venecias.
“Presidentja Osmani ka shprehur falënderim për mbështetjen e vazhdueshme që Komisioni i Venecias i ka ofruar Republikës së Kosovës”, thuhet më tutje.
Ndryshe, gjatë ditës së sotme, edhe Kryetari i Kuvendit të Kosovës, Glauk Konjufca, është takuar me shefen e Zyrës Ndërlidhëse të Greqisë në Kosovë, Heleni Vakali.
Konjufca ka ritheksuar rëndësinë e njohjes së pavarësisë së Kosovës nga Greqia dhe mbështetjen për proceset e integrimit evropian dhe euroatlantik. Ai ka kërkuar përkrahjen për liberalizimin e vizave, anëtarësimin e Kosovës në Këshillin e Evropës dhe organizata të tjera ndërkombëtare.
Ndryshe, sot gjatë ditës delegacionin e Venecias e ka pritur në takim edhe kryetari i Kuvendit të Kosovës, Glauk Konjufca, i shoqëruar nga këshilltarët.
Në takim, ndër të tjera, Kuvendi ka njoftuar se është diskutuar për reformën në drejtësi, me theks të veçantë procesin e vetingut dhe rëndësinë e këtij procesi për sundimin e ligjit dhe shtetit të së drejtës.