Presidentja e Kosovës, Vjosa Osmani, ka pritur në takim shefin e ri të Zyrës së BE-së në Kosovë, ambasadorin Aivo Orav.
Në këtë takim, temë diskutimi ishte përkushtimi i Kosovës drejt anëtarësimit në BE, me ç’rast e para e vendit ka thënë se Kosova vazhdon të jetë në ballë të reformave në të gjitha fushat, duke harmonizuar legjislacionin e saj me atë të BE-së.
Tutje, Osmani ka theksuar se Kosova ka mbushur të gjitha kushtet për ta fituar statusin e vendit kandidat të BE-së.
“Presidentja Osmani ka thënë se Kosova vazhdon të jetë në ballë të reformave në të gjitha fushat, duke harmonizuar legjislacionin e saj me atë të BE-së, si dhe duke qenë plotësisht e bashkërenduar me politikën e përbashkët të jashtme dhe të sigurisë së BE-së. Tutje, Presidentja theksoi se Kosova ka mbushur të gjitha kushtet për ta fituar statusin e vendit kandidat të BE-së”, thuhet në njoftimin e presidencës.
Në takim është diskutuar edhe për zhvillimet e fundit në Kosovë.
Presidentja Osmani ka përsëritur rëndësinë e madhe të trajtimit të shteteve aspiruese bazuar në merita dhe në përqafimin e vlerave që qëndrojnë në themelet e BE-së.
“Në takim u diskutua edhe për zhvillimet e fundit në vend, duke përfshirë sigurinë, si dhe bashkëpunimin e institucioneve të Republikës së Kosovës dhe atyre të Bashkimit Evropian me qëllim të përmbushjes së objektivave të përbashkëta. Në këtë frymë, Presidentja Osmani ka përsëritur rëndësinë e madhe të trajtimit të shteteve aspiruese bazuar në merita dhe në përqafimin e vlerave që qëndrojnë në themelet e BE-së”, thuhet tutje në njoftim.