Nga sot, vendimi i Qeverisë së Kosovës për heqjen e të gjitha tarifave për produktet e importuara nga Shtetet e Bashkuara të Amerikës ka hyrë në fuqi.
Këtë e ka komentuar presidentja, Vjosa Osmani, e cila ka theksuar rëndësinë strategjike të këtij vendimi për marrëdhëniet Kosovë-SHBA.
Presidentja Osmani tha se Kosova është krenare që ishte vendi i parë që propozoi largimin e të gjitha barrierave tregtare ndaj aleatit të saj më të afërt.
“Që nga sot, hyn në fuqi vendimi i Kosovës për një tarifë ZERO për të gjitha mallrat amerikane. Jemi krenarë që kemi qenë vendi i parë që propozoi heqjen e të gjitha barrierave ndaj aleatit tonë më strategjik.
Presidentit dhe popullit amerikan: Kosova është partneri juaj i besueshëm në përpjekjet tuaja për ta bërë Amerikën dhe aleatët e saj më të fortë, më të sigurt dhe më të begatë”, ka shkruar Osmani në X.