Presidentja e Kosovës, Vjosa Osmani, ka deklaruar se Shtetet Bashkuara të Amerikës nuk kanë aleat më të madh sesa shteti dhe populli i Kosovës.
“Historia dëshmon se angazhimi i Shteteve të Bashkuara të Amerikës është ekzistencial. Për ne është jashtëzakonisht e rëndësishme mbështetja e rrugës euroatlantike nga aleatët tonë”, ka deklaruar ajo.
Gjatë takimit me të dërguarin e posaçëm të Shteteve të Bashkuara për Ballkanin Perëndimor, Gabriel Escobar, ajo ka bërë të ditur se ka potencuar rëndësinë e fillimit të dialogut strategjik ndërmjet dhe Kosovës dhe Serbisë për iniciativën që kanë marrë ditë më parë.
“Kosova mbetet e përkushtuar për të mbështetur aleatët tanë në mbrojtjen e paqes dhe demokracisë. Mbështetjen për Ukrainën, sanksionet ndaj Rusisë e dëshmojnë më së miri lidhjen tonë me ndërkombëtarët”, ka deklaruar ajo.
Po ashtu, e para e vendit ka thënë se gjatë takimit me Esocobar-in është diskutuar edhe për nevojën për të ecur përpara në procesin e dialogut, dhe ka theksuar se “Kosova është dhe gjithnjë ka qenë pala më konstruktive në këtë proces dhe po ashtu është e gatshme ta rrisë edhe më shumë angazhimin dhe gatishmërinë saj në mënyrë që të intensifikohet procesi i dialogut”.
“Ne mund të jemi vend i vogël, por duke punuar me ShBA-në do të vazhdojmë me të arritura të mëdha”, ka thënë ajo.
“Jemi të gatshëm ta rrisim intensifikimin e dialogut”
Sipas Osmanit, mbështetjen për Ukrainën dhe sanksionet ndaj Rusisë “e dëshmojnë më së miri lidhjen tonë me ndërkombëtarët”.
“Kosova është pala konstruktive në procesin e dialogut, dhe është e gatshme qe të rrisë edhe më shumë angazhimin dhe gatishmërinë e saj në mënyrë që të intensifikohet procesi i dialogut. Shfrytëzova rastin për të shprehur pakënaqësinë tonë për moszbatim të marrëveshjeve nga ana e Serbisë”, është shprehur ajo.
Sipas saj, Serbia, jo vetëm që ka refuzuar t’i shpërbëjë strukturat kriminale në pjesën e veriut, por, në fakt, vazhdon t’i mbështesë financiarisht dhe politikisht.
“Shfrytëzova rastin për ta shprehur shqetësimin dhe pakënaqësinë tonë për moszbatimin e marrëveshjet të nënshkruara nga ana e Serbisë, duke përfshirë në veçanti refuzimin e vazhdueshëm nga ana e tyre për shpërbërjen e grupeve kriminale në pjesën e veriut, të cilat vazhdojnë t’i frikësojnë dhe kërcënojnë serbët e Kosovës”, ka deklaruar ajo
Ajo gjatë konferencës për media ka falënderuar aleatët amerikanë për mbështetjen e vazhdueshme, duke thënë se kjo mbështetje dëshmohet sa herë që Escobar është në Kosovë.
Escobar, ka mbërritur në Kosovë, ku fillimisht është takuar me presidenten Osmani në ambientet e Presidencës së Kosovës, takim ky që kishte filluar në orën 08:45.
Po ashtu, emisari amerikan, Escobar pas takimit me presidenten e Kosovës, do të takohet edhe me kreun e Qeverisë, Albin Kurti.
“Kryeministri i Republikës së Kosovës, Albin Kurti, pret në takim Zëvendës Ndihmës Sekretarin e Shteteve të Bashkuara për Çështje Evropiane dhe Euroaziatike dhe njëherësh të dërguarin e posaçëm të Shteteve të Bashkuara të Amerikës për Ballkanin Perëndimor, Gabriel Escobar”, thuhet në njoftimin e kryeministrisë.
Përveç krerëve të shtetit, emisari amerikan pritet të takohet edhe me liderët e partive opozitare.