Presidentja e Kosovës, Vjosa Osmani, u takua me Presidentin e Këshillit Evropian, Antonio Costa, në prag të Samitit BE-Ballkani Perëndimor në Bruksel.

Në këtë takim, presidentja Osmani shprehu urimet për detyrën e re të Costas, duke theksuar nevojën për vazhdimin e bashkëpunimit për çështje të përbashkëta.

“Presidentja e Republikës së Kosovës, Vjosa Osmani, në prag të Samitit BE-Ballkani Perëndimor, në Bruksel, është pritur në takim nga Presidenti i Këshillit Evropian, António Costa.

Në këtë takim, Presidentja Osmani e ka uruar atë për detyrën e re, duke shpresuar në vazhdimin e bashkëpunimit në interes të përbashkët”, thuhet në njoftim.

Gjatë bisedës, Osmani informoi për sfidat e sigurisë me të cilat po përballet Kosova, duke përmendur sulmin e fundit terrorist në Zubin Potok, që kishte si objektiv infrastrukturën jetike të vendit.

Sipas saj, ky sulm kishte qëllim të dëmtonte furnizimin me ujë, energji, ngrohje dhe telekomunikacion për qytetarët.

Sipas njoftimi të Presidencës, presidentja Osmani prezantoi prova që lidhin Serbinë me këtë dhe sulmin terrorist të 24 shtatorit në Banjskë.

“Presidentja Osmani diskutoi për zhvillimet në fushën e sigurisë, përfshirë sulmin e fundit terrorist në infrastrukturën vitale të Kosovës, sulm ky që kishte për qëllim që të linte një pjesë të madhe të qytetarëve të Kosovës pa ujë, pa energji elektrike, pa ngrohje dhe me pengesa në sistemin e telekomunikimit. Ajo prezantoi para Presidentit Costa dëshmitë për lidhjet e Serbisë me këtë sulm, si dhe me sulmin e shtatorit të vitit të kaluar, i cili ishte akt agresioni ndaj Kosovës. Ajo shtoi se kryeterroristi që kishte zbatuar urdhërat e Beogradit zyrtar për sulme ndaj Kosovës, pra Radojqiç, akoma është i lirë dhe kjo dëshmon mungesën e gatishmërisë së Serbisë për përgjegjësi dhe llogaridhënie për aktet e agresionit ndaj Kosovës.

Presidentja Osmani ka shprehur gatishmërinë e plotë të Kosovës për bashkëpunim me partnerët ndërkombëtar për hetimin e aktit terrorist kundër infrastrukturës vitale në Kosovë, gjersa i ka falënderuar BE-në, SHBA-të si dhe shtetet e tjera të NATO-s, dhe përtej për solidaritetin e treguar dhe ndihmën e ofruar. Ajo potencoi se është shumë me rëndësi, që përveç hetimit, puna jonë e përbashkët të fokusohet edhe në parandalimin e sulmeve të reja.

Presidentja theksoi se në mënyrë që të garantohet stabilitet në Ballkanin Perëndimor është më rëndësi që të jemi unik në luftimin e kërcënimeve që rrezikojnë paqen dhe sigurinë e Kosovës dhe gjithë rajonit”, thuhet më tej në njoftim.

Në takim, Osmani rikonfirmoi përkushtimin e Kosovës ndaj integrimit evropian dhe kërkoi mbështetje për avancimin e statusit të kandidatit të Kosovës për anëtarësim në BE.

“Ajo shtoi se Kosova është e përkushtuar në përmbushjen e objektivave të saj të integrimit evropian, ndaj kërkoi mbështetje për avancimin e aplikimit të Kosovës për statusin e vendit kandidat në BE. Për më tepër, Presidentja nënvizoi se heqja e masave kufizuese do të ishte një mesazh i fuqishëm për Kosovën për të kontribuar në vlerat dhe vizionin e përbashkët të Bashkimit Evropian, duke argumentuar sërish se ato janë të padrejta dhe se e dëmtojnë më së shumti popullin e Kosovës, por edhe vet parimin e balancit dhe paanshmërisë në dialogun Kosovë-Serbi”.