Presidentja e Kosovës, Vjosa Osmani, ka pritur sot në takim të rregullt të Ngarkuarën me Punë të Ambasadës së Shteteve të Bashkuara të Amerikës në Kosovë, Anu Prattipati.
Në këtë takim siç ka njoftuar Zyra e Presidencës, një ndër temat kryesore ishte nevoja urgjente për konstituimin e institucioneve të reja të vendit, me theks të veçantë në pasojat që po shkakton zvarritja e këtij procesi.
“Sikurse edhe në takimet e kaluara, u diskutua për rëndësinë e konstituimit sa më parë të institucioneve të Kosovës dhe për pasojat me të cilat përballet vendi ynë për shkak të kësaj zvarritjeje”, thuhet në njoftim.
Përveç situatës politike, Osmani dhe Prattipati diskutuan edhe për bashkëpunimin bilateral mes Kosovës dhe SHBA-së, përfshirë fushat e diplomacisë dhe mbrojtjes.