Presidentja Vjosa Osmani gjatë qëndrimit në Shtetet e Bashkuara të Amerikës është  takuar me presidentin e Estonisë Alar Karis, në New York, të mërkurën e 21 shtatorit.

Në këtë takim është diskutuar për thellimin e marrëdhënieve dypalëshe, zhvillimet në rajon e më gjerë, si dhe bashkëpunimin e mëtejmë.

Ndërkaq presidentja Osmani ka theksuar përkushtimin e Kosovës për ta avancuar integrimin euroatlantik dhe në të njëjtën kohë shtroi nevojën e  përmbylljes urgjente të liberalizimit të vizave.

Ndër të tjera është diskutuar edhe për dialogun me Serbinë për të cilin Osmani ka thënë se Kosova mbetet palë konstruktive në dialog, i cili synon një marrëveshje përfundimtare, të përqendruar në njohjen e ndërsjellë.

Presidentja Osmani ka falënderuar homologun estonez për mbështetjen e vazhdueshme dhënë anëtarësimit të Kosovës në Këshillin e Evropës dhe në organizatat e tjera ndërkombëtare.