Presidentja e Kosovës, Vjosa Osmani ka vizituar kryetarin e komunës së Mamushës, Adbdülhadi Krasniç me ç’rast, të njëjtit kanë biseduar mundësitë e zhvillimit të vendit dhe sfidat drejt kësaj të fundit, në veçanti, mungesën e ujit.
Përpjekja e grave të kësaj komune drejt zanatit të rrobaqepësisë dhe qëndisjes, inciativë e filluar nga një projekt i qendrës për fuqizimin e grave, është cilësuar sikurse “inkurajuese”.
Me rastin e vizitës në komunën e Mamushës, Presidentja Osmani ka vizituar fabrikën e prodhimit të thasëve “Birlik”, fabrikë kjo që pjesën më të madhe të të punësuarve e ka të gjinisë femërore.
“Gjatë vizitës në këtë komunë, vizitova edhe fabrikën e prodhimit të thasëve “Birlik”, një rrëfim suksesi në këtë biznes familjar, ku shumica e të punësuarve janë gra. Që prej viteve të 70-ta ky biznes vazhdon traditën, ndërkaq gratë janë shtyllë e fuqishme e kompanisë, duke ndihmuar jo vetëm në bilancin pozitiv të saj, por edhe të familjeve të tyre”, ka shkruar Osmani, në Facebook.
Vizita e presidentes në Mamushë u mbyll me me një vizitë në serrën e Selajdin Mazrek. Osmani ka kujtuar kohën sfiduese të rritjes së inflacionit dhe njëherësh, ka paralajmëruar vizitat e saj në komunat e tjera të vendit.