Presidentja e Kosovës, Vjosa Osmani, në Kongresin amerikan, në ceremoninë e nënshkrimit të marrëveshjes me MCC-në ka thënë se Shtetet e Bashkuara të Amerikës janë zëri më i fortë për Kosovën, duke shtuar se këto dy vende ndajnë një lidhje të fortë së bashku.

Tutje, ajo ka shtuar se ShBA-ja dhe Kosova duhet që të jenë pranë njëra-tjetrës në kohë të mira dhe të vështira, në mënyrë që të arrihet edhe më shumë së bashku në të ardhmen.

Sipas Osmanit, kjo marrëveshje e ofron Kosovën dhe SHBA-në drejt një sistemi të inovacionit, dhe sipas saj, promovon gjithëpërfshirje.

Të mërkurën e 27 korrikut, Kosova ka nënshkruar marrëveshjen me vlerë prej 236.7 milionë eurosh me Sfidat e Mijëvjeçarit në Shtetet e Bashkuara të Amerikës(ShBA) për programin e energjisë.

Marrëveshja është nënshkruar nga Ministrja e Ekonomisë, Artane Rizvanolli dhe kryeshefja ekzekutive e MCC-së, Alice Albright.

Ndërsa nikoqir në këtë ceremoni ishin Gregory Meeks, kryetar i Komisionit për Punë të Jashtme të Dhomës së Përfaqësuesve bashkë me presidenten Vjosa Osmani dhe kryeministrin Albin Kurti.