Pas paralajmërimit të Partisë SocialDemokrate, se do të mbajë një protestë të mërkurën e 21 shtatorit, për shkak të vizitës së kryetares së Gjykatës Speciale, Ekaterina Trendafilova, në Kosovë, të njëjtës protestë do t’i bashkohet edhe Organizata e Veteranëve të Luftës së UÇK-së.
Kështu ka bërë të ditur ushtruesi i detyrës së kryetarit të kësaj organizate, Faton Klinaku.
Ai me anë të një postimi në llogarinë e tij në Facebook, ka thënë se roli i kryetares nuk është që të edukojë shoqërinë civile dhe mediat.
“Shoqëria jonë civile është mjaftueshëm e edukuar për të kuptuar se çfarë po ndodh me gjykimet politike në Hagë; Shoqëria jonë civile është mjaftueshëm e edukuar për të kuptuar se njerëzit mbahen pengje që dy vjet në paraburgim atje; Shoqëria jonë civile është mjaftueshëm e edukuar për të kuptuar se nuk po gjykohen krimet dhe masakrat e pushtuesit, por përkundrazi po përdoren shpifjet e tyre për ta gjykuar UÇK-në”, ka thënë Klinaku.
“Prandaj, edhe për shumë arsye të tjera, mbështesim dhe marrim pjesë në protestën e organizuar më 21.09.2022 (e mërkurë), ora 10:00, Hotel “Astoria”, Gjilan, për të kundërshtuar vizitën e Ekaterina Trendafilova”, shtoi ai.
Ndryshe, sa i përket vizitës së kryetares së Gjykatës Speciale, Ekaterina Trendafilova, Molliqaj kishte thënë se kur i kanë dërguar ftesën për vizitë në Kosovë për herë të parë, Trendafilova ka refuzuar dhe si pasojë kanë marrë përgjigje negative.
Dardan Molliqaj kishte thënë se “Gjykata Speciale merr vendime politike”.
Molliqaj ka njoftuar se më datën 21 shtator në orën 10:00, kur kryetarja e Gjykatës Speciale do të jetë për vizitë në Gjilan, do të organizojnë protestë. Teksa Molliqaj kërkoi që t’i bashkohen edhe veteranët e luftës.
Arsyeja e organizmit të protestës, sipas Molliqajt, është të tregojnë se qytetarët nuk pajtohen me veprimet e kësaj gjykate.
Molliqaj paralajmron protestë ndaj vizitës së Trendafilovës, kërkon që të bashkohen veteranët