Mëngjesin e së martës, situata raportohet të jetë e qetë në pikëkalimet kufitare të Kosovës, pa ndonjë fluks të madh të automjeteve.
Sipas raportit të Qendrës Kombëtare për Menaxhim Kufitar, situata është e qetë, me pritje dhe kolona të pakta të automjeteve.
Në disa nga pikat e kalimit kufitar, veçanërisht në Merdarë dhe te Dheu i Bardhë, pritjet për të dalë nga Kosova janë deri në 20 minuta, ndërsa në pikat e tjera kufitare, pritja maksimale është 10 minuta.
Kolonat e automjeteve për në dalje nga vendi janë shtrirë deri në 40 metra në pikën e Merdarës, si dhe te Dheu i Bardhë, raportohet të ketë një radhë automjetesh deri në 30-40 metra.
Në vendkalimin kufitar Muçibabë, bashkatdhetarët presin deri në 10 minuta, ndërsa në Mutivodë, pritjet tani janë deri në 5 minuta.
Përveç kësaj, në të gjitha vendkalimet kufitare të tjera, nuk ka probleme të mëdha me pritjet, duke lejuar bashkatdhetarët të hyjnë dhe të dalin nga Kosova me pritje të shkurtër, zakonisht prej 3 deri në 5 minutash.