Zenun Pajaziti, anëtari i Partisë Demokratike të Kosovës (PDK), ka thënë se nuk kishte besuar që pas shumë vitesh do të kishte një proces të tillë për ish-krerët e Ushtrisë Çlirimtare të Kosovës (UÇK).
“Para nesh është ende një sfidë e gjatë, me të cilën, duhet të përballen krerët e Ushtrisë Çlirimtare të Kosovës, por krejt kjo sfidë, kjo sagë, pse jo do të mund të përfundonte edhe mirë”, ka thënë Pajaziti.
Një përfundim me pafajësinë e tyre, sipas Pajazitit, do të ishte mirë për Evropën.
“Do të inkurajonte qytetarët evropianë që t’i luftonin padrejtësitë, shkeljet. Ne nuk harrojmë, besoj që dhe Evropa e ka të freskët se në fund të shekullit 20 në Kosovë kishte ndodhur një gjenocid, një dhunë e paparë… ishte një kryengritje e qytetarëve, për t’u çliruar”, ka thënë tutje Pajaziti.
Për Marshin për Drejtësi që u zhvillua më 2 prill, Pajaziti në emisionin special të RTV Dukagjini tha se masoviteti shpreh edhe shqetësimin e qytetarëve.
“UÇK-ja dhe lufta e saj mbeten si diçka që është e shenjtë dhe askush nuk do t’i ketë të cenueshme”, ka shtuar ai, duke potencuar se gjithçka që po ndodh në Hagë nuk është në “dorën e tyre”. Sipas tij, në ‘dorën e tyre’ është të tregojnë mbështetje ndaj ish-krerëve të UÇK-së.
“Një gjykim i tillë është krejtësisht i padrejtë, dhe aq më tepër, diçka që ndoshta nuk mund të imagjinohet, dënimi i tyre”, ka shtuar ndër të tjerash ai, në edicionin special të RTV Dukagjini.
Pajaziti nga PDK-ja është shprehur se nëse ish-krerët e UÇK-së shpallen të pafajshëm, kjo do të ishte shpagim qytetar për t’iu dhënë kurajo popujve të vegjël që të bëjnë gjithçka për lirinë e tyre.