Zyrtarët pakistanezë të shëndetësisë kanë raportuar një shpërthim të sëmundjeve të shkaktuara nga uji në zonat e goditura nga përmbytjet e fundit, derisa autoritetet shtojnë përpjekjet për të siguruar ujë të pijshëm e të pastër për qindra mijëra njerëz që humbën shtëpitë e tyre në fatkeqësi.

Sipas një raporti të lëshuar nga zyrtarët shëndetësorë të enjten, diarreja, sëmundjet e lëkurës dhe infeksionet e syve po përhapen në kampet e ndihmave të ngritura nga qeveria në të gjithë vendin. Më shumë se 90,000 raste të diarresë u raportuan në një nga provincat më të goditura, Sindh, në 24 orët e fundit, raporton Al Jazeera.

Zhvillimi i fundit vjen një ditë pasi qeveria dhe Organizata Botërore e Shëndetësisë ngritën shqetësime për përhapjen e sëmundjeve që vijnë nga uji në mesin e viktimave të përmbytjeve. Pakistani fajëson ndryshimin e klimës për shirat jashtëzakonisht të hershëm dhe të dendur të musonit, të cilët që nga qershori kanë shkaktuar përmbytje të shpejta që kanë vrarë afro 1200 njerëz dhe kanë prekur 33 milionë njerëz. Rreth një milion shtëpi janë dëmtuar ose shkatërruar gjithashtu.

Një burrë mban djalin e tij teksa kalon nëpër ujërat e përmbytjeve në Charsadda në provincën Khyber Pakhtunkhwa të Pakistanit. [Mohammad Sajjad/Foto AP]
Ujërat e përmbytjeve vazhduan të tërhiqen në shumicën e pjesëve të vendit, por shumë rrethe në provincën jugore Sindh mbetën nën ujë. Gati gjysmë milioni njerëz të zhvendosur nga përmbytjet po jetojnë në kampet e ndihmës. Në Sindh, mijëra kampe mjekësore janë ngritur në zonat e goditura nga përmbytjet për të trajtuar viktimat, tha Dr Azra Fazal Pechuho, ministër provincial i shëndetësisë. Janë vendosur gjithashtu njësi mjekësore të lëvizshme.

OBSH thotë se po rrit mbikëqyrjen për diarrenë akute, kolerën dhe sëmundjet e tjera ngjitëse dhe po ofron furnizime mjekësore për institucionet shëndetësore.

Viktimat e përmbytjeve kalojnë nëpër ujë në Dera Allah Yar. [Amer Hussain/Reuters]
Mjekët thonë se në fillim ata po shihnin kryesisht pacientë të traumatizuar nga përmbytjet, por tani po trajtojnë mijëra njerëz që vuajnë nga diarreja, infeksionet e lëkurës dhe sëmundje të tjera të shkaktuara nga uji. Shumë gra shtatzëna që jetonin në zonat e prekura nga përmbytjet ishin gjithashtu të ekspozuara ndaj rreziqeve.

Sipas Fondit të OKB-së , 6.4 milionë viktima të përmbytjeve kanë nevojë për ndihmë humanitare. Ata thanë se rreth 650,000 gra shtatzëna në zonat e prekura nga përmbytjet, përfshirë 73,000 që pritet të lindin në muajin e ardhshëm, kanë nevojë për shërbime shëndetësore të nënës.

Pamje e përgjithshme e shtëpive të zhytura në Dera Allah Yar, Jafferabad. [Stringer/Reuters]