Në fshatin Jabukë të Zubin Potokut po zhvillohen veprime hetimore në një lokacion ku dyshohet se mund të ketë mbetje mortore nga lufta e fundit në Kosovë.
Gazetarja e TV Dukagjinit, Blerta Zuka, ka raportuar nga vendi i ngjarjes, ku janë siguruar pamje nga lokacioni i dyshuar.
Në terren shihen pjesëtarë të Policisë së Kosovës dhe zyrtarë të EULEX-it, të cilët janë të pranishëm gjatë zhvillimit të veprimeve hetimore.
Këtë lokacion sot e kanë vizituar edhe ministri në detyrë i Punëve të Brendshme, Xhelal Sveçla, si dhe ministri në detyrë i Administrimit të Pushtetit Lokal, Elbert Krasniqi.
Prokuroria Speciale e Republikës së Kosovës dhe Policia e Kosovës kanë njoftuar se, në kuadër të hetimeve për këtë rast, është identifikuar një lokacion i dyshuar në fshatin Jabukë, ku dyshohet se mund të ketë mbetje mortore.
Sipas njoftimit të përbashkët të institucioneve, më 2 gusht, gjatë veprimeve hetimore në terren, është identifikuar vendi i dyshuar.
Prokuroria Speciale ka bërë të ditur se do t’i paraqesë Gjykatës Themelore në Prishtinë kërkesë për lejimin e zhvarrimit dhe kryerjen e ekzaminimeve të nevojshme, në përputhje me legjislacionin në fuqi.
Pas marrjes së autorizimeve nga gjykata, Prokuroria Speciale, në koordinim me Policinë e Kosovës dhe institucionet e tjera kompetente, pritet të ndërmarrë veprimet e nevojshme për zbardhjen e rastit.