Me pankartën e targave ilegale të Mitrovicës “KM” në duar, disa të rinj në Rusi kanë realizuar një video duke brohoritur “Kosova është zemra e Serbisë”.
Kjo video e cila po qarkullon në rrjetin social në Twitter, tregon edhe njëherë bashkëpunimin ruso-serb.
Ngjitësi, i cili u shndërrua në pankartë në Rusi, është dizajnuar nga serbët e Kosovës, të cilët kundërshtojnë implementimin e unifikimit të targave të Republikës së Kosovës, shkruan KP.
Rusija💪🇷🇸❤️🇷🇺💤 pic.twitter.com/BBUVrhsYqx
— Samo_mama2🥰 (@samo_mama2) August 7, 2022
Rusia ia ka dhënë përkrahjen Listës Serbe në Kosovë, që nga viti 2017, kur këtë e deklaroi Sergey Zelezniak në takim me kryetarin e Listës Serbe, Goran Rakiq.
Atëherë, Rakiq e kishte ftuar Zelezniak-un, përfaqësuesin e partisë së Putinit “Rusia e Bashkuar” që t’i vizitonte serbët e Kosovës.
Gazetarja ruse – person i padëshirueshëm në Kosovë
Ditëve të fundit në Kosovë një gazetare ruse është shpallur si person i padëshirueshëm nga ministri i Punëve të Brendshme, Xhelal Sveçla.
Përmes një postimi në Facebook, ai ka thënë se Daria Aslamovas i është ndaluar hyrja në Kosovë për pesë vjet.
“Kushdo që me qëllime apo direktiva të caktuara, cenon apo tenton të destabilizojë vendin tonë, do të përballet pa diskutim me forcën e ligjeve të Republikës së Kosovës”, ka thënë mes të tjerash Sveçla.
Aslamova është arrestuar nga Policia e Kosovës në veri të vendit më 6 gusht.
Duke bërë të ditur arrestimin e saj, Sveçla ka thënë se “shumë shtete e kanë vërtetuar se ajo ka qenë e angazhuar në spiunazh për inteligjencën ushtarake ruse dhe se ka vepruar në petkun e gazetares”.
“E njëjta ka marrë pjesë edhe në luftimet në Ukrainë duke propaganduar mbi pushtimin rus ndaj Ukrainës”.
Sveçla ka thënë se autoritetet e Kosovës kanë qenë në dijeni për veprimtarinë e saj, dhe sipas tij, Aslamovas i ndalohet hyrja në shumë shtete.
Me diçka të tillë ajo është përballur në Moldavi më 2017.
Atë periudhë ajo ka qenë duke punuar për median ruse, Komsomolskay Pravda, e cila njihet për qëndrimet pro-Kremlinit.