Nënkryetari i Sindikatës së Punëtorëve Shëndetësor në QKUK, Enlirat Duraku, ka thënë se do të duhej një grevë në QKUK me qëllim që të ruhet dinjiteti i infermierëve, të pengohet rritja e mëtejme e mbingarkesës me punë për infermierët në përpjekje që realisht të sigurohet kujdesi cilësor dhe meritor për qytetarët.
Se a do të realizohet një gjë e tillë, Portali Dukagjini ka kontaktuar me Durakun pas postimit të tij në Facebook, postim ky i cili përfshin deklaratën e mësipërme të tij.
“Të hënën nga ora 11:00, në mbledhjen e kryesisë dhe këshillit drejtues edhe do të kërkoj zyrtarisht masën sindikale grevë. Se a do të kalojë apo jo, kjo…”, ka deklaruar Duraku.
Sindikata e Punëtorve Shëndetësorë të QKUK-së ka ftuar publikisht SHSKUK/QKUK-në që t’i anulojë urdhëresat si në vijim:
-Urdhëresën që infermieri të shkruhet në hyrje/dalje nga dhoma e pacientit duke e konsideruar si urdhëresë diskriminuese dhe përdorim të standartit të dyfishtë, pasi komunitetet e tjera nuk i nënshtrohen kësaj urdhërese,
-Urdhëresa që infermierët të bëjnë evidentimin e frekuentimit të palëve civile nëpër klinika të QKUK-së duke e konsideruar urdhëresë e cila nuk bën pjesë në përshkrimin e detyrave dhe përgjegjësive të infermierit,
-Urdhëresa e cila thotë se infermierët e turneve duhet të marrin obligimin e sigurimit të barërave gjatë vikendeve, punë për të cilën infermierët e turneve nuk e kanë obligim as nuk kompensohen për këtë detyrë,
-Urdhëresën e cila e obligon infermierin që ta ftojë mjekun në rast nevoje, pasi sikurse infermieri po ashtu edhe mjeku janë subjekte që u nënshtrohen obligimeve kontraktuale, ndërsa secila klinikë tashmë ka mjekët dhe infermierët e tyre kujdestarë, ndërsa si të tillë, as infermieri e as mjeku nuk do të duhej të ketë nevojë për ftesë, pasi do të duhej që të ishin në vendet e tyre të punës duke mos pasur nevojë për ftesa.
