Kur kanë kaluar 6 muaj nga përfundimi i afatit, Ejup Nishori nuk i ka pranuar akoma nga shteti paratë për subvencionimin e teksteve shkollore për fëmijët e tij.
Vitin e kaluar, Ministria e Arsimit zgjodhi ta ndryshojë praktikën e viteve të kaluara, duke mos ofruar falas librat për nxënësit.
Zgjodhi që t’i subvencionojë prindërit, në mënyrë që ata t’i blejnë vet materialet shkollore për fëmijët e tyre.
Por, Nishori thotë se nga shtatori i vitit të kaluar nuk e marrë asnjë përgjigje nga shteti se pse nuk i janë transferuar paratë në xhirollogari.
“I kam dy fëmijë në shkollë, njëri në klasë të tretë, njëri në klasë të gjashtë. Kam apliku, i shihni edhe ju datat që i kam dërguar tek ju, aplikimi ka qenë me rregull, aplikimi më është kthyer me sukses, mjetet nuk janë dal. Nuk e di ku është faji”, tha Ejup Nishori, qytetar.
Nishori thotë se aplikim e ka bërë me 27 gusht, në ditët e para të hapjet së periudhës për aplikim, e cila zgjati deri në fund të shtatorit.
Ai ankohet në formën se si u vendos të subvencionohen për mjetet shkollore, derisa preferon formën e mëparshme të pajisjes me libra.
“Me mjete vetanake i kam blerë dhe mu më ka shqetësu kur është bërë për të gjithë pse të mos bohet edhe për fëmijë të mijë pagesa, sepse jo që është shumë e madhe por është rregullore e shtetit, pse mos me funksionu shteti për të gjithë. Përpara kemi pas, por nuk e kemi pas këtë problem se i ka kry shkolla, drejtori i shkollës, drejtori i arsimit”, tha Nishori.
Televizioni ka dërguar pyetje në Ministrinë e Financave dhe atë të Arsimit për këtë çështje, por nuk ka marrë përgjigje.