Të shtunën rreth orës 10:00, Grupi Parlamentar i Partisë Socialiste do të mblidhet në mënyrë që të sigurojë të paktën 20 nënshkrime, aq sa i nevojitet kandidatit për president Bajram Begaj, që të depozitohet zyrtarisht në Kuvend.
Pastaj në orën 16:00 do të mblidhet Komisioni i Ligjeve, ku do t’i shqyrtojnë kriteret ligjore dhe kushtetuese të kandidatit për president.
Ndërkaq, në orën 18:00 do të nisë seanca e kuvendit, ku pritet që kandidatura e Bajram Begajt të dalë në votim.
Ky do të jetë rundi i katërt për zgjedhjen e presidentit, por është hera e parë që ka një kandidat, emri i të cilit shkon në kuvend.
Në rundin e katërt nevojiten, gjithsej, 71 vota, e që partia në pushtet veçse i ka, për ta caktuar presidentin e ardhshëm.
Opozita ka paralajmëruar se nuk do ta votojë kandidatin e PS-së për president, dhe se një pjesë e saj do ta bojkotojë procesin e zgjedhjes së tij.
Kurse partia e Sali Berishës, ka bërë të ditur se nuk do ta votojnë Begajn për president, por seancën e së shtunës nuk do ta bojkotojnë.
Aktualisht, detyrën e presidentit e mban Ilir Meta, i cili do ta dorëzojë detyrën me 24 korrik.
Mbledhja e PS-së, ku ishte diskutuar për pozitën e presidentit, zgjati më shumë se dy orë, dhe sipas kryeministrit Rama, ishin diskutuar rreth 26 kandidatura të mundshme.
Sipas Ramës, u eliminuan të gjithë ata kandidatë që kishin lidhje me Partinë Socialiste, edhe pse sipas tij, ishin njerëz me kredibilitet.