Partia Guxo i ka dënuar deklaratat kërcënuese ndaj kryeministrit të Kosovës, Albin Kurti, të cilat, sipas tyre, po bëhen nga eksponentë radikalë që kinse, sipas tyre, i mbrojnë vlerat e luftës.
Sipas tyre, drejtësia duhet të reagojë ndaj deklaratave kërcënuese ndaj kryeministrit Kurtit.
“Partia GUXO dënon ashpër kërcënimet me vrasje që ditëve të fundit po i bëhen kryeministrit të Republikës së Kosovës, z. Albin Kurti. Kërcënimet në varg, që i bëhen z. Kurti, nga eksponentë të ashtuquajtur, të krahut “radikal”, që mbrojnë “vlerat e luftës”, në emër të mbrojtjes së interesit kombëtar e të Kosovës, nga injorantë e trushplarë, janë veprime të cilave duhet prerë rrënjët menjëherë nga organet e drejtësisë të Republikës së Kosovës. Askush nuk ka tagrin që të ndajë qytetarët në patriotë dhe tradhtarë dhe të lëshojë ‘fetva’ për dënimin me vrasje të ‘tradhtarëve të atdheut'”, thuhet në njoftim.
Në reagimin e tyre thuhet se liderë partiakë, eksponentë politikë e medialë me deklaratat e tyre kinse Kurti rrezikon paqen në rajon me luftëra të tjera, nuk duhet të injorohen.
“Koincidenca, kur këto kërcënime bëhen, bashkë me shpalljen e Kurtit si bashkëpunëtor dhe argat i Serbisë nga ndonjë lider partiak dhe nga eksponentë të rëndësishëm politikë e medialë, si dhe deklaratat e krerëve të Serbisë se Kurti rrezikon paqen dhe sigurinë në rajon me luftëra të reja dhe se ai gjoja të vetmin qëllim ka spastrimin e Serbëve nga Kosova përmes dhunës dhe kërcënimeve, nuk mund të konsiderohen si të rastësishme dhe të injorohen”, thuhet në reagim.
“Kontaminimi i tillë i opinionit publik krijon terren të përshtatshëm që këto kërcënime të bëhen realitet dhe pastaj të fillojë loja ping pong se krimin e bëri Serbia apo krimin e bënë shqiptarët në emër të mbrojtjes së interesit kombëtar”, vijon njoftimi.
Tutje, në reagim thuhet se organizatat e dala nga lufta dhe partitë politikë duhet të distancohen “nga gjuha kërcënuese e eksponentëve dhe militantëve të vet”.