Pas akuzave të Partisë Demokratike të Kosovës (PDK), të cilët kishin akuzuar Ministren e Punëve të Jashtme (MPJD) dhe ministrin Fikrim Damka, për keqpërdorimin e 1.1 milion eurove përmes një marrëveshjeje me organizatën Caritas, ka reaguar kjo e fundit.
Të enjten organizata Caritas me seli në Ferizaj, kanë thënë se distancohen nga zhvillimet e fundit ku përfolet emri i organizatës së tyre.
Përmes një reagimi në Facebook, nga kjo organizatë thonë se janë organizata e vetme e cila njihet nga Kisha Katolike në Kosovë si organizatë humanitare dhe e cila ka legjitimitetin për të vepruar me këtë emër.
“Ky reagim bëhet për të njoftuar opinionin e gjerë dhe për të qartësuar përdorimin e emrit “Caritas”. Caritas Kosova distancohet nga këto zhvillime dhe nuk ka të bëjë asgjë me marrëveshjen në fjalë. Caritas Kosova është organizata e vetme e cila njihet nga Kisha Katolike në Kosovë si organizatë humanitare dhe e cila ka legjitimitetin për të vepruar me këtë emër”, thuhet në postimin e tyre në Facebook.
Tutje në postim thuhet se “operimi i organizatave tjera në territorin e Republikës së Kosovës me emrin Caritas, konsiderohet nga ne si ndërhyrje flagrante në reputacionin dhe mandatin e Caritas Kosova”.
Akuzat i ka mohuar edhe ministrja Donika Gërvalla-Schwartz, e cila përmes një reagimi ka thënë se” Jo 1.1 milion euro, por as edhe 1.1 cent”.
![](https://www.portalid.com/wp-content/uploads/2022/04/Donika-Gervalla-1024x683-1.jpeg)
Ndryshe, Prokuroria Themelore në Prishtinë, të enjten e dy qershorit ka njoftuar se ka nisur procedurat e hetimit për të gjitha shkrimet e publikuara në media lidhur me rastet e dyshuara për korrupsion.
Kështu është bërë e ditur nga prokuroria përmes një komunikate për media.
“Prokurori i Shtetit njofton opinionin publik se ka filluar procedurën e verifikimit dhe hetimit për të gjitha shkrimet e publikuara ditëve të fundit në media lidhur me rastet e dyshuara për korrupsion”, thuhet në njoftim.