Emisari për misione të posaçme i Shteteve të Bashkuara të Amerikës, Richard Grenell, ka kritikuar kryeministrin e Kosovës, Albin Kurti, duke e akuzuar se ka dëmtuar marrëdhëniet mes Kosovës dhe SHBA-së.
Në një postim në platformën “X”, Grenell publikoi një deklaratë të mëhershme të Kurtit, ku ai e kishte cilësuar Presidentin Joe Biden si një nga “miqtë më të mëdhenj të Kosovës”.
Megjithatë, Grenell theksoi se veprimet e Kurtit kanë sjellë një përkeqësim të ndjeshëm të marrëdhënieve Kosovë-ShBA.
“Marrëdhëniet e SHBA-së me Kosovën pësuan gjatë presidencës së Joe Biden. Departamenti i Shtetit i Bidenit dhe Shtëpia e Bardhë kritikuan veprimet dhe paaftësinë e Kurtit për të rritur ekonominë e Kosovës.
Kurti zgjodhi grindjet politike dhe ndërmori veprime të njëanshme. Ai solli marrëdhëniet Kosovë-SHBA në një pikë të ulët. Ai u dënua nga udhëheqësit evropianë, NATO dhe ekipi i Joe Biden. Kurti mbështeti Joe Biden dhe Kamala Harris dhe megjithatë ai ishte ende i kritikuar nga ata”, ka shkruar Grenell në X.