Një person ka humbur jetën mbrëmjen e së dielës si pasojë e plagëve të marra me thikë në fshatin Zhur të Prizrenit.

Zëdhënësi i Policisë për rajonin e Prizrenit, Shaqir Bytyqi, ka bërë të ditur se viktima, mashkull, ishte dërguar fillimisht në emergjencën e Spitalit Rajonal të Prizrenit në gjendje të rëndë shëndetësore dhe më pas ishte transferuar në QKUK në Prishtinë, ku ndërroi jetë nga plagët e marra.

Sipas Bytyqit, i dyshuari për vrasjen është lokalizuar dhe arrestuar nga njësitë policore. 

Gjatë bastisjes është gjetur edhe thika që dyshohet të jetë përdorur në kryerjen e krimit. 

Me vendim të prokurorit, i dyshuari është ndaluar për 48 orë.