I ftuar në emisionin “Jeto” me Xheneta Asllanin në Radio Dukagjini, sonte ishte profesori dhe psikologu Bujar Gallopeni.
Gallopeni deklaroi se shoqëria është e orientuar tek moshat e reja, dhe shumë pak vëmendje i kushtohet moshës së shtyer. Kjo sipas tij ndikon edhe në shëndetin mendor të moshës së tretë, pasi shumica e tyre janë rritur në një shoqëri kolektive, e tani po jetojmë në një shoqëri individualiste që është një ndryshim i madh për ta.
Ndonëse thotë se ne njihemi si shtet i të rinjve, kjo nuk është momentalisht e vërtetë, pasi sipas psikologut ka rënë nataliteti, të rinjtë po ikin nga vendi secilën herë e më shumë, dhe trendi i plakjes është përtej projeksioneve. Trendi i ikjes së të rinjve nga vendi por edhe lëvizja brenda vendit, ka bërë që moshat e shtyera të jenë secilën herë e më të vetmuar, që ndikon në përjetimin emocional dhe psikologjik të tyre, duke i bërë të ndihen të izoluar nga shoqëria.
Gallopeni deklaron se këto gjëra ndikojnë tek rritja e pasigurisë tek mosha e tretë, këtu lidhet edhe faktori ekonomik pasi gjendja me pensione në vendin tonë nuk është e mirë, duke sjellur pasigurinë ekonomike tek ta për nevojat e tyre. Psikologu shton gjithashtu se nuk ka hapësira të mjaftueshme të dedikuara për personat në moshë të shtyer.