Pasi përfunduan takimin e zakonshëm para Qeverisë së Kosovës, e kur kaluan 48 orë nga takimi i tyre në sallën plenare, deputetët e PDK-së u rikthyen në Kuvend
Ulëset e sallës u zunë nga ta e si rëndom iu bashkëngjiten edhe deputetët e Aleancës.
Kësaj radhe, në tavolinat e deputetëve lanë edhe një mesazh në letër, thirrjen për respektimin e Kushtetutës dhe konstituimin e Kuvendit.
“Ju keni fituar zgjedhjet por jo të drejtën për ta mbajtur shtetin peng. Kosova nuk është pronë e 53 deputetëve. Kuvendi është i 120 deputetëve, i qytetarëve, Kosova është e qytetarëve. Kujt po i konvenon bllokada sot, kush po fiton nga moskonstituimi i kuvendit. Kush po shpreson që nga një krizë të përfitoj. Nëse dikush mendon që zgjedhjet e reja i sjellin më shumë vota le t’ua thotë qytetarëve pse po shkojmë në zgjedhje”, ka thënë deputeti i PDK-së, Jakup Nura.
Edhe nga Aleanca kërkesa ishte e njëjtë.
Deputetja Albana Bytyqi, tha se urgjenca nuk lidhet vetëm me politikën, por me problemet e përditshme të qytetarëve.
“Të gjithë e dinë që Kuvendi e institucionet duhet të formohen për shkak se nafta është 1.78, Kuvendi dhe institucionet duhet të formohen për shkak se duhet të zhbëhet Ligji për Shtetësinë, Kuvendi dhe institucionet duhet të formohen për shkak se Prishtina dhe shumë qytete e fshatra në Kosovë nuk kanë rrymë”, ka thënë Bytyqi.
Pas mbledhjes në sallë, deputetët vazhduan në hollin e Kuvendit, nga ku u paralajmëruan edhe aksione të tjera, në rast se nuk ka lëvizje nga partia fituese e zgjedhjeve të 7 qershorit për zgjidhje të këtij ngërçi politik.