Partia Demokratike e Kosovës ka intensifikuar aktivitetet e saj politike, duke mbledhur urgjentisht jo vetëm Kryesinë, por edhe kryetarët e degëve në të gjithë vendin, në një përpjekje për mobilizim të gjerë kundër, siç thotë, shkeljeve të mundshme kushtetuese.
Në njoftimin e saj, Partia Demokratike e Kosovës thekson se strukturat partiake janë vënë në gatishmëri të plotë për të reaguar ndaj çdo veprimi të pushtetit që bie ndesh me Kushtetutën dhe rendin juridik të vendit.
Kryetari i PDK-së, Bedri Hamza, paralajmëroi se nëse vazhdohet me, siç e quajti ai, një proces antikushtetues për zgjedhjen e presidentit, reagimi do të jetë i menjëhershëm dhe i organizuar.
“Nëse sonte procedohet me këtë zgjedhje antikushtetuese, do të ketë reagim të organizuar politik, institucional dhe qytetar”, është shprehur Hamza.
PDK rithekson se do të përdorë të gjitha mjetet demokratike në dispozicion për të kundërshtuar atë që e konsideron si përpjekje për përmbysje të rendit kushtetues.
“PDK thekson se do të jetë në ballë të përpjekjeve politike dhe qytetare për mbrojtjen e Kushtetutës dhe Republikës, duke përdorur të gjitha mjetet demokratike për të ndalur përmbysjen e rendit kushtetues”, thuhet në njoftim e PDK-së.