Një 34-vjeçar është gjetur pa shenja jete mëngjesin e së enjtes në tarracën e shtëpisë së tij në Pejë. Rasti ka ndodhur në rrugën “Vëllezërit Dalamani”, ndërsa Policia është njoftuar rreth orës 09:35 nga një familjar i viktimës.
Zëdhënësi i Policisë për Rajonin e Pejës, Driton Rugova, ka bërë të ditur se njësitë policore dhe ekipi mjekësor kanë dalë menjëherë në vendin e ngjarjes, ku është konstatuar vdekja e personit.
“Policia menjëherë ka dalë në vendin e ngjarjes, ndërsa edhe ekipi mjekësor ka konstatuar vdekjen e viktimës”, ka deklaruar Rugova.
Lidhur me rastin është njoftuar Prokurori i Shtetit, i cili ka urdhëruar që trupi i pajetë të dërgohet në Institutin e Mjekësisë Ligjore për obduksion.
Policia ka iniciuar rastin si “Hetim i vdekjes”.