Një pjesë e qytetit të Vushtrrisë ka mbetur pa ujë të pijshëm për shkak të një defekti në rrjetin kryesor të ujësjellësit.
Kompania Rajonale e Ujësjellësit “Mitrovica” ka njoftuar se ka ndodhur një pëlcitje në gypin kryesor në rrugën “Lutfi Musiqi”, çka ka ndërprerë furnizimin për banorët që lidhen përmes këtij rrjeti.
Sipas njoftimit të publikuar të dielën në Facebook, kjo zonë do të mbetet pa ujë deri të hënën, më 19 maj, kur pritet të përfundojnë punimet për riparimin e defektit.
“Për shkak të pëlcitjes së gypit kryesor që e furnizon rr. ‘Lutfi Musiqi’, ajo zonë mbetet pa ujë deri në ditën e nesërme. Rikthimi i furnizimit me ujë bëhet pas sanimit të defektit. Faleminderit për mirëkuptimin tuaj!”, thuhet në njoftimin e KRU “Mitrovica”.