Radha e gjatë e pritjeve nuk është e pazakontë në korridoret e shoqatës së pensionistëve.
Por këtë herë, ata i mblodhi një njoftim për kompensimin e pensionit sipas indeksit të jetesës.
Të njëjtit kishin dëgjuar nga miq e familjarë se kinse për ta do të ndaheshin deri në 500 euro, andaj kanë ardhur për t’i dorëzuar dokumentet.
Mirëpo përpos asaj informate, ata nuk dinë më shumë.
“Kam ardhë se thanë do letra për pensionere me ndreq, deri në 300 euro. U njoftuam nga njëri tjetri. Pres që na i qesin po fjalë borxh”, tha Fatime Grajqevci, pensioniste.
“Kam ardhë mi dorëzu do dokumenta, thanë për regjistrim. U njoftova para një jave, thanë do avokatë po merren me to, mi dorëzu po i pruna vet. Hiç s’di veç kam ardhë mi dorëzu, çka t’bohet për tonë”, tha Isuf Reçica.
Njësoj janë shprehur edhe pensionistë të tjerë prapa kamerave.
Një letër në formë njoftimi për këtë çështje gjendjen në zyrën numër shtatë të Shoqatës së Pensionistëve që mban vulën e saj dhe nënshkrimit e drejtorit Muhamed Qyqalla.
Por, kur Dukagjini e ka pyetur se mbi çfarë baze ka lëshuar këtë thirrje për pensionistët, ai nuk ka pranuar të deklarohet me arsyetimin se nuk është kompetent.
Megjithatë, Qyqalla ishte prezent dhe pranonte dokumentet që dorëzoheshin nga pensionistët.
Por, Qeveria i ka konfirmuar Dukagjinit se ajo nuk ka nxjerrë kurrfarë vendimi që parasheh ndonjë kompensim të tillë.
Zëdhënësi Përparim Kryeziu ka thënë se kjo mund të jetë skemë mashtruese.
“Ju njoftojmë se për çfarëdo ndryshimi eventual në lidhje me skemat pensionale, Qeveria e Republikës së Kosovës e njofton opinionin publik me kohë dhe në mënyrë transparente. Prandaj, të gjitha informatat që nuk janë komunikim zyrtar i lëshuar nga Qeveria apo ministria përkatëse, në lidhje me temën në fjalë, janë të pavërteta dhe mund të përbëjnë skema mashtruese apo edhe tendencë për keqpërdorimin e të dhënave personale”, tha Përparim Kryeziu, zëdhënës i Qeverisë së Kosovës.
Informacione të ngjashme kanë qarkulluar edhe në të kaluarën, andaj Qeveria ka ftuar qytetarët që të kenë kujdes dhe mos të bien pre e mashtrimeve dhe dezinformove.
Në këtë përgjigje për Dukagjinin, Ekzekutivi bën apel te qytetarët që rastet e tilla ku u premtohen shuma te parave në këmbim të një pagese tash, t’i paraqesin në organet e rendit.
Më tre prill të këtij viti, Ministria e Financave kishte bërë apel tek qytetarët për kujdes nga përfituesit e skemave pensionale të cilat po kërkojnë të dhënat personale të tyre.