Për të 12-tën herë, Organizata Joqeveritare “Ngritja e Zërit” ka dorëzuar në Gjykatën Kushtetuese të Kosovës dosjet rreth vlerësimit të kushtetutshmërisë së aktit juridik të Gjykatës Supreme, me rastin e refuzimit të padisë për kompensimin e dëmeve të luftës.
Drejtori i kësaj OJQ-je, Jahir Bejta, në emisionin “Rreth e Rrotull” të RTV Dukagjini, tha se me refuzimin e kërkesave të tyre, gjykatat e rregullta kanë bërë shkelje.
Edhe përkundër refuzimit, Bejta theksoi se do të këmbëngulin në kërkesat e tyre deri atëherë kur edhe do të kompensohen dëmet e luftës.
Ai ka theksuar se “padrejtësisht palëve të dëmtuara në cilësinë e palëve paditëse është duke u mohuar e drejta e garantuar, qasja në drejtësinë vendore” sepse siç thotë ai, për këtë punë janë gjykatat.
“Sot është hera e 12-të që dorëzojmë dosje në Kushtetuese pas shterjes së vendimeve nga Gjykata Supreme. Kërkojmë kompensimin e dëmeve të luftës, në cilësinë e viktimave. Për dëme janë gjykatat tona dhe për këtë viktimat duhet të kenë qasje në drejtësinë vendore”, ka deklaruar Bejta.