Në Forcën e Sigurisë së Kosovës(FSK), përgjatë 22 muajve, janë realizuar 7 procese të gradimit dhe emërimit të ushtarakëve të FSK-së, me numrin prej rreth 1 mijë gradimesh dhe mbi 3 mijë emërime të reja.
Ministri i Mbrojtjes ka thënë se një ndër objektivat e tij operacionale është edhe avancimi i sistemit të qëndrueshëm të menaxhimit të karrierës sipas kritereve dhe standardeve më moderne të menaxhimit të karrierës së ushtarakëve.
“Ndër objektivat e mi operacional, përveç tjerash, është avancimi i sistemit të qëndrueshëm të menaxhimit të karrierës sipas kritereve dhe standardeve më moderne të menaxhimit të karrierës së ushtarakëve tanë në të gjitha rangjet, profilet dhe nivelet”, ka shkruar Mehaj.
“Proceset e avancimit dhe emërimit mbi bazën e njohurive, shkathtësive, aftësive dhe përvojës së ushtarakëve janë thelbësore për ruajtjen dhe forcimin e moralit ushtarak dhe gatishmërisë efektive operacionale të forcave”, ka shkruar tutje Mehaj.
Ministri Mehaj ka theksuar se janë në rrugën e duhur për avancimin e sistemit aktual, “sikur secilin projekt tjetër deri më tani”.