Përplasja mes FIFA-s dhe UEFA-s është përshkallëzuar, pasi organi më i lartë i futbollit botëror ka akuzuar UEFA-n për zhvillimin e një “fushate dezinformimi” dhe për përpjekje për të ndikuar në garën për zgjedhjet presidenciale të FIFA-s.
Në dokumente të reja gjyqësore, FIFA ka pretenduar se veprimet e UEFA-s janë ndërmarrë në “mungesë të mirëbesimit dhe me qëllim ngacmimi”, duke hedhur poshtë akuzat e ngritura ndaj saj dhe presidentit Gianni Infantino.
Përplasja ligjore mes dy institucioneve kryesore të futbollit ndërkombëtar vjen pasi muajin e kaluar UEFA dorëzoi dokumente ligjore në Shtetet e Bashkuara, përmes të cilave kërkoi zbulimin e provave dhe dokumenteve nga FIFA.
UEFA paralajmëroi gjithashtu se çështja mund të përfundonte me një kallëzim penal në Zvicër.
Organi që drejton futbollin evropian ka akuzuar presidentin e FIFA-s, Gianni Infantino, për “keqmenaxhim kriminal” lidhur me idenë e tij për shitjen e aksioneve të Kupës së Botës tek investitorët privatë.
FIFA ka reaguar ndaj këtyre pretendimeve të hënën në mbrëmje, duke kundërshtuar ashpër versionin e paraqitur nga UEFA.
Sipas FIFA-s, dokumentet e dorëzuara nga UEFA përmbajnë “deklarata të shumta të rreme ose mashtruese rreth FIFA-s dhe Infantinos”.
Akuzat e ndërsjella e thellojnë përplasjen mes FIFA-s dhe UEFA-s, ndërsa mosmarrëveshja tashmë ka kaluar edhe në terrenin ligjor.