Pikturat e reja të piktorit të njohur Orhan Kurtolli do të shfaqen më 29 mars në ambientet e Galerisë “Hani i dy Robertëve” në kryeqytet. Ndërsa dyert hapen nga ora 19:00.
Ky projekt është përkrahur nga Ministria e Kulturës, Rinisë dhe Sporteve.
Përmes një postimi nga Galeria “Hani i 2 Robertëve” në rrjetin social “Facebook”, pikturat e Kurtollit të kuruara nga Shkëlzen Maliqi i ka quajtur “tërheqëse” dhe se “ato pëlqehen për shkak se artisti gjeti masat delikate thjeshtësimi të trajtave dhe koloritit, që në ciklet e mëhershme i kishte ca të ngatërruara me ndërnyjetime dhe koklavitje formash me çka mëtonte pasqyrimin e shumëkuptimësisë zhurmuese të jetës bashkëkohore urbane – sepse ai ishte dhe mbetet piktor me preokupim urbanocentrik”.
“Përtej titullit” janë të kuruara nga Shkëlzen Maliqi dhe arsyeja se pse titullohet kështu është “konceptimi i imazheve Kurtolli i sajon me intriga narrative që prekin senzorët e kërshërisë që te njeriu inteligjent, zgjohet kur sheh rebuse dhe enigma që shërbejnë si çelës depërtimi në thellësitë dhe fshehtësitë e jetës përtej banaliteteve të shfaqura në përditshmërinë ekzistenciale. Shikuesi duhet të deshifron, të zbulon dhe rizbulon enigmën e pikturuar, andaj veprave të tij artisti edhe nuk i vë tituj, por i trajton toptan”.
“Duke thyer tabunë e ngulitur të turpit nga lakuriqësia, që ka qenë frustrim i pjesës të madhe të traditave kulturore njerëzore, Kurtolli implicite i referohet se e vërteta e artit duhet të jetë kundër tabuve ashtu siç, p.sh., Mikelanxhelo “paturpësisht” mbushi me lakuriqësi Cappellën Sistina, tempullin e një besimi që nga zanafilla ishte thelbësisht puritan, antitrup dhe antijetë mondane, dhe se edhe e vërteta të së vërtetës duhet të jetë e tillë, anti, e lakuriqësuar. E vërteta o është lakuriqe, o vetëm shtiret si e vërtetë pasi jetësoren e mbulon me turp”, ka shkruar Maliqi.