Petar Petkoviq përfaqësues i palës serbe për dialogun në mes të Kosovës dhe Serbisë, e ka akuzuar kryeministrin e Republikës së Kosovës, Albin Kurti, se ai po pretendon se ka ndikim nga Rusia në mënyrë që ta legjitimojë ndërhyrjen në Veri të Kosovës.
Sipas Petokiviq, kjo është një taktikë e Kurtit që të kërkojë nga ambasadat e shteteve të huaja njohe reciproke nga Serbia.
“Nuk ka dyshim se Albin Kurti me deklaratën e tij të fundit tregon haptazi se do luftë, jo dialog dhe marrëveshje”, ka thënë në komunikatën për media Petkoviqi.
Petkoviq ka kërcënuar se “nëse Kurti konfirmon publikisht se Asociacioni i Komunave Serbe nuk do të formohet kurrë dhe se serbët duhet të pranojnë vendime të njëanshme dhe të dhunshme për targat dhe kartat e identitetit, është e qartë për të gjithë se Kurti po fton për konflikte në Kosovë dhe Metohi”.
Petkoviq ka thënë se serbët në Kosovë e konsiderojnë Kurtin përgjegjës, “të gjitha keqtrajtimet, incidentet, privimin e lirisë së lëvizjes dhe të drejtave të tjera demokratike” dhe se sipas tij “revolta e tyre është pasojë e veprimeve të njëanshme, të dhunshme dhe të paligjshme të Kurtit dhe jo ndonjë agjendë e huaj e orkestruar”.
Petkoviqi ka thanë se përpjekjet e Prishtinës për të imponuar agjendën e bisedimeve në Bruksel me “ëndrra boshe për ‘njohje reciproke’’”, nuk janë gjë tjetër veçse një taktikë për ta bërë dialogun të pakuptimtë dhe për ta prishur atë ende pa filluar.