Petar Petkoviq, përfaqësuese i palës serbe në dialogun ndërmjet Kosovës dhe Serbisë, gjatë një takimi me ambasadoren e Kinës në Beograd, Chen Bo, temë kryesore kishte Kosovën.
Ai ia ka sqaruar Chen Bo, se Kosova është ajo që po e pengon ecurinë e dialogut, derisa asaj i foli edhe për “përshkallëzime të situatës së sigurisë në Kosovë”.
“Pavarësisht krizave që Kosova i gjeneron çdo ditë, Serbia mbetet e përkushtuar ndaj dialogut, si dhe bisedimet janë barriera më efektive për përshkallëzimin e tensioneve ndëretnike dhe garanci e sigurisë së popullit serb”, ka thënë Petkoviq.
Petkoviq ka fajësuar vendimin e Qeverisë së Kosovës për targat dhe dokumentet personale, të cilat siç thotë ai po e “shembin drejtpërdrejt dialogun dhe kërcënojnë të destabilizojnë situatën në terren”, shkruan Tanjug, transmeton Dukagjini.
Gjithashtu, ai ka akuzuar krerët e institucioneve të Kosovës se me veprimet ditore politike nuk janë të sinqertë për krijimin e kushteve për normalizimin e marrëdhënieve politike dhe ndëretnike në rajon, dhe se sipas tij, qëllim kryesor e kanë “gjenerimin e tensioneve dhe shkaktimin e destabilizimit”.