“Presheva dhe Bujanoci janë çështje të Serbisë qendrore, të ligjeve dhe Kushtetutës sonë, dhe për këtë nuk mund të ketë asnjë lloj diskutimi në kuadër të dialogut – pavarësisht përpjekjeve të [kryeministrit në detyrë të Kosovës, Albin] Kurtit dhe [zëvendëskryeministrit në detyrë, Besnik] Bislimit për t’i futur këto tema”, deklaroi Petkoviq pas takimit të tij në Bruksel me të dërguarin e BE-së për dialogun, Peter Sorensen.

Sipas tij, “dihet se cilat janë temat e dialogut – çështja e Kosovës, pozita e popullit serb, formimi i Asociacionit të komunave me shumicë serbe, dhe ajo që mund të bëjmë për të arritur zgjidhje kompromisi që do të sillnin paqe dhe stabilitet në Kosovë”.

Çështjen e Preshevës e ka përmendur një ditë më parë Bislimi, pas një takimi me Sorensenin.

Ai ka thënë se Kosova e konsideron proces shumë të rëndësishëm mbështetjen e shqiptarëve në Luginën e Preshevës përmes ndihmave për fermerët e vegjël.

Në Serbi jetojnë më shumë se 60.000 shqiptarë, të cilët përbëjnë pakicën e katërt më të madhe atje, sipas regjistrimit të fundit të popullsisë më 2022.

Në raportet ndërkombëtare, Lugina e Preshevës – term që përdoret për Preshevën, Medvegjën dhe Bujanocin, komuna të banuara me shumicë shqiptare në jug të Serbisë – konsiderohet tërësisht e izoluar dhe thuhet se merr vëmendje vetëm në kohë zgjedhjesh.

Shqiptarët në Serbi ankohen se autoritetet atje nuk ua njohin diplomat e Kosovës, kërkojnë integrim nëpër institucionet shtetërore të Serbisë, lejim të përdorimit të simboleve kombëtare shqiptare dhe për zgjidhjen e çështjes së pasivizimit të adresave.

Takimi i Petkoviqit me Sorensenin u mbajt të martën në Bruksel, si pjesë e përgatitjeve për takimin trepalësh në kuadër të dialogut, që pritet, siç tha ai, të ndodhë së shpejti.

Petkoviq tha se në takimin me Sorensenin u fol edhe për mbylljen e institucioneve serbe në veri nga autoritetet e Kosovës dhe për vendimet e autoriteteve lokale në veri, që ai i cilësoi si “anti-serbe”. U diskutua edhe çështja e personave të zhdukur, për të cilën Petkoviq tha se ka pasur përparim.

Ai akuzoi institucionet e Kosovës për “terrorizim dhe përndjekje të përfaqësuesve politikë serbë në Kosovë, veçanërisht të Listës Serbe”.

Sipas tij, kryetari i Listës Serbe – partisë më të madhe të serbëve në Kosovë – ka marrë ftesë nga Prokuroria e Kosovës për t’u paraqitur më 10 qershor, “me gjasë për protestat dhe barrikadat e vitit 2022”.