“Kurti nuk ka të drejtë të plotësojë pozitat policore që serbët i kanë bojkotuar në veri të Kosovës me policë shqiptarë”, ka deklaruar Drejtori i zyrës se ashtuquajtur për Kosovën në Qeverinë e Serbisë, Petar Petkoviq.
Sipas Petkoviq, Republika e Kosovës, nuk ka të drejtë që të marrë vendim për shpalljen e zgjedhjeve të jashtëzakonshme në veri të Kosovës, pasi 95 për qind e popullsisë janë serbë.
“Manipulimi i Kurti me fakte dhe shifra është i kotë, sepse as serbët nuk i duan targat e Kurtit, as zgjedhjet e tij të imponuara dhe as policët shqiptarë nga jugu, që nuk kanë çfarë të kërkojnë në veri të Kosovës”, ka thënë Petkoviq.
Ai e ka akuzuar kryeministrin Kurti se është duke i shkelur të gjitha marrëveshjet nga Brukseli. Sipas tij, Kurti nuk ka ndërmend ta formojë Asociacionin e Komunave Serb.
“Më mirë për Kurtin të fillonte urgjentisht formimin e AKS dhe ta respektonte marrëveshjen, se sa të nxitonte me vendim të njëanshëm për shpalljen e zgjedhjeve të jashtëzakonshme në katër komuna në veri të Kosovës, duke kërcënuar me plotësimin e pozitave policore në veri të Ibrit”, ka thënë Petkoviq, raprton Kosovo Online transmeton Portali Dukagjini.