Protesta e paralajmëruar nga Njësitë Speciale të Kosovës është pezulluar.
Kështu është bërë e ditur përmes një njoftimi nga Policia e Kosovës.
“Njësia Speciale Intervenuese (NJSI), Njësia për Trajtimin e Mjeteve Eksplozive (NJTME) dhe njësi tjera të Policisë së Kosovës, bazuar në Ligjin Nr.08/L-166 për Tubime Publike, përmes njoftimit zyrtar kishin paralajmëruar mbajtjen e protestës për sot me 07.11.2023, nga ora 12:00, në sheshin ‘Skënderbeu’ në Prishtinë, por e njëjta tani është pezulluar”, thuhet në njoftim.
Sipas njoftimit, protesta e paralajmëruar është pezulluar përkohësisht pas takimit mes NJSI-së dhe NJTME-së me drejtorin e përgjithshëm të Policisë së Kosovës.
Deri te pezullimi ka ardhur pasi njësive speciale i është kumtuar lajmi se kryeministri Albin Kurti do t’i presë në takim për t’i diskutuar kërkesat e tyre.
“Deri te pezullimi i protestës ka ardhur pasi drejtori i Përgjithshëm i PK-së, i shoqëruar nga menaxhmenti i PK-së, gjatë takimit me këto njësi i ka informuar se kryeministri i Republikës së Kosovës ka premtuar që javën e ardhshme do t’i presë në takim zyrtar menaxhmentin e PK-së, së bashku me përfaqësuesit e këtyre njësive, për t’i diskutuar kërkesat e tyre, respektivisht për të gjetur një zgjidhje”, thuhet në njoftim.
Kjo protestë është pezulluar deri në një vendim tjetër.
Pjesëtarët e Njësitit Special Intervenues, ndryshe njësiti më elitar i Policisë së Kosovës, kanë protestuar para Qeverisë së Kosovës më 1 nëntor.
Ata kanë kërkuar shtesa më të mëdha të rrezikshmërisë, si dhe kategorizim më të mirë të vendeve të punës.