Dakordimin e shumëkërkuar për Planin Evropian, Kosova dhe Serbia e arritën mbrëmjen e 27 shkurtit në Bruksel.
Mirëpo, kryeministri kosovar, Albin Kurti dhe presidentit serb, Aleksandar Vuçiq nuk u pajtuan për aneksin i cili shpjegon se si duhet të zbatohet plani.
Finalizimi i këtij udhërrëfyesi i është ngarkuar emisarit evropian, Mirsolav Lajçak dhe si afat për të është vendosur 18 marsi, kur pritet të mbahet takimi i radhës mes liderëve.
Deri atëherë, diplomati sllovak do t’i shpeshtojë udhëtimet në Prishtinë dhe Beograd, në atë që njihet si “diplomaci fluturuese”.
Si e tillë, ajo parasheh që BE-ja, në këtë rast si palë e tretë, të përcjellë qëndrimet e palëve nga njëra te tjetra, deri në momentin e takimit të përbashkët.
Në këtë proces, Qeveria e Kosovës ka dhënë sugjerimet e para publike.
“Ky plan duhet të përmbajë detaje konkrete dhe të jetë gjithëpërfshirës, të ofrojë efektivitet në zbatim dhe të jetë i sekuencuar në mënyrë të balancuar”, ka njoftuar Qeveria e Kosovës.
Pikërisht ky proces gati tri javor, vlerësohet i vështirë dhe sfidues për Kosovën nga shoqëria civile.
Dy çështjet të do të ndikojnë në këtë, sipas Grupit për Studime Juridike dhe Politike, janë Asociacioni dhe statusi i Kishës Ortodokse.
Arbresha Loxha, drejtoreshë e GLPS-së ka thënë se “Konsideroj që do të ketë dinamika dhe do të jetë proces i vështirë sepse numri i temave dhe çështjeve që do të diskutohen dhe për të cilat do të arrihet dakordim është goxha i madh, ndërsa periudha është relativisht e shkurtër. Kështu që BE-ja dhe SHBA-të e kanë marrë një lloj pajtimi prej të dy palëve në parim për secilën prej atyre çështjeve”.
Asociacioni është në mesin e pikave të udhërrëfyesit që BE-ja u ka dorëzuar palëve si propozim më 6 dhjetor të vitit të kaluar, e të cilin RTV Dukagjini e kishte publikuar para tri javësh.
Aty thuhet se jo më larg se 15 ditë nga data e nënshkrimit të marrëveshjes bazë, Ekipi Menaxhues duhet t’i prezantojë dialogut të lehtësuar, draftin e parë të Statutit në më mënyrë që të nisin diskutimet për të.
Kur kjo të ndodhë, sipas draftit, palët duhet formalisht të kenë në fuqi menjëherë: Njohjen e ndërsjellë të dokumenteve dhe simboleve respektive, si dhe shkëmbimin e misioneve diplomatike.
Ky draft është publikuar nga mediat edhe të martën, një ditë pas dakordimit në Bruksel.
Por, raportimin për dokumentin, Qeveria e ka quajtur të pasaktë dhe të paqëndrueshëm.
Zëdhënësi i ekzekutivit, Perparim Kryeziu ka thënë se për planin e zbatimit do të diskutohet dhe negociohet në takimet e radhës.
BE-ja synon që puna për zbatimin e marrëveshjes të finalizohet para takimit të radhës të Këshillit Evropian, që mbahet më 23 dhe 24 mars.