Policia e Kosovës ka bërë thirrje që të mos prezantojnë dokumente të falsifikuara në institucione pasi është vepër penale dhe dënohet me gjobë ose me burgim deri në katër vjet.
Kjo pasi policia përmes një komunikate për media ka bërë të ditur se kohëve të fundit ka pranuar një numër të konsiderueshëm të lëndëve për hetim të dërguara nga Ambasadat në Kosovë, që ndërlidhen me veprimet e qytetarëve gjatë aplikimit për pajisje me viza, me dokumente të falsifikuara.
Aty thuhet se disa nga dokumentet e falsifikuar më së shpeshti janë certifikata e gjuhës dokumentit i Trustit – kursimeve pensionale dhe dokumentit – pasqyrës bankare.
“Referuar kësaj, Policia e Kosovës apelon tek të gjithë qytetarët që të mos bien pre e personave të pandërgjegjshëm dhe të marrin mbi vete përgjegjësinë e prezantimit të dokumenteve të falsifikuara tek institucionet përkatëse, pasi që në këtë mënyrë bien ndesh me ligjin dhe kryejnë vepër penale për të cilën do të japin përgjegjësi para organeve të drejtësisë”, thuhet në komunikatë.
Tutje thuhet se identifikimi i dokumenteve të tilla është lehtë i zbatueshëm dhe se asnjë person me dokumente të tilla nuk mund të kalojë në asnjë ambasadë.
“Kushdo që përpilon dokument të falsifikuar, ndryshon dokumentin origjinal, me qëllim të shfrytëzimit të atij dokumenti si origjinal ose me dije përdor dokumentin e falsifikuar apo të ndryshuar si origjinal, dënohet me gjobë ose me burgim deri në katër (4) vjet”.