Policia e Kosovës në kuadër të bashkëpunimit ndërkombëtar me Policinë e Zvicrës, ka arritur ta konfiskojë një veturë me vlerë rreth 100 mijë euro.

Vetura, sipas njoftimit të policisë, ishte në kërkim nga autoritetet zvicerane, ajo u gjet në veri të Mitrovicës.

“Në kuadër të bashkëpunimit ndërkombëtar policor, Policia e Kosovës ka pranuar një informacion nga autoritetet e Policisë Federale të Zvicrës, në lidhje me dyshimin se një veturë e llojit Mercedes, e cila ishte në kërkim nga autoritetet zvicerane, mund të jetë në territorin e Republikës së Kosovës. Përmes bashkëpunimit profesional me Drejtorinë për Bashkëpunim Ndërkombëtar Policor (ILECU), po ashtu edhe angazhimit të jashtëzakonshëm dhe veprimit të shpejtë e profesional, të zyrtarëve policorë nga DRP Mitrovicë Veri, më datë 10.10.2023 është arritur të gjendet dhe konfiskohet vetura e llojit Mercedes (vlera e përafërt  mbi 100 000 €) e cila ishte në kërkim në Zvicër”, thuhet në njoftim.

Rasti, sipas Policisë së Kosovës, është trajtuar konform procedurave ligjore nga njësitet përkatëse policore.