Policia e Kosovës ka bërë të ditur se ka konfiskuar mbi 30 mijë euro të padeklaruara në fshatin Bistricë të komunës së Leposaviqit.
Personi i dyshuar me inicialet M.R., është shtetas i Serbisë, i cili është ndalur nga Policia në një pikë kontrolli, ku edhe i janë gjetur të hollat në makinën që po voziste.
“Me datën 22.01.2023 rreth orës 00:28, Njësia Speciale Operative përderisa po realizonin një pikë kontrolli në fshatin Bistricë, kanë ndaluar veturën Skoda ngjyrë e zezë me targa të huaja me vozitës M.R (2003), shtetas i Serbisë. Gjatë kontrollit të veturës, janë gjetur një sasi e konsiderueshme e të hollave në vlerë prej 30.870 euro, të cilat personi i dyshuar i kishte të padeklaruara”, ka njoftuar Policia.
Policia njoftoi se “në lidhje me rastin është njoftuar prokurori kujdestar i krimeve të rënda, i cili ka sugjeruar të iniciohet vepra penale ‘Mosdeklarim i pasurisë’ dhe të konfiskohen të hollat”.
Personi i dyshuar është liruar në procedurë të rregullt.
Policia e Kosovës mbetet e përkushtuar në ofrimin e sigurisë dhe parandalimin e të gjitha dukurive negative dhe veprave penale në vend.