Të premten, rreth orës 18:20 në fshatin Zllakuqan të Klinës në Kosovë, ka ndodhur një vrasje, prej të cilës arrestohen tre persona të dyshuar.
Se arrestimet kanë të bëjnë pikërisht me vrasjen e sotme, për RTV Dukagjini-n e ka konfirmuar zëdhënësi i Policisë për Rajonin e Pejës, Fadil Gashi.
Siç tregon Gashi, policia fillimisht ishte njoftuar për një plagosje me armë.
Më pas, i plagosuri ishte dërguar për në Emergjencën e Spitalit të Pejës.
Por, vetëm pak kohë pas mbërritjes në spital, mjeku kujdestar ka konstatuar vdekjen.
Policia është vënë menjëherë në kërkim të të dyshuarve dhe operacioni ka rezultuar me tre të arrestuar.
Gashi tha për RTV Dukagjini-n se është ende herët të dihen motivet që çuan në vrasje, porse policia po i kryen hetimet dhe po bën ekzaminimin e vendit të ngjarjes.