Policia e Kosovës ka arrestuar një 22-vjeçar në Prizren, pasi gjatë patrullimit të natës tek ai janë gjetur armë dhe mjete të ftohta.
Sipas njoftimit policor, rasti ka ndodhur më 10 maj, rreth orës 01:30, kur një patrullë e Stacionit Policor në Prizren ka ndaluar për kontroll një veturë me katër persona.
Gjatë kontrollit rutinë, tek i dyshuari V.B., 22-vjeçar nga Peja, policia ka gjetur një pistoletë me tetë fishekë dhe një brisk me teh rreth 9 centimetra.
I dyshuari është shoqëruar në stacion policor, ku është intervistuar në prani të avokatit mbrojtës. Për rastin janë njoftuar hetuesit, njësia e krim-teknikës dhe prokurori kujdestar.
Me urdhër të prokurorit, 22-vjeçarit i është caktuar masa e ndalimit për 48 orë, ndërsa arma dhe brisku janë sekuestruar.