Një person në Prizren po hetohet nga Policia e Kosovës pasi ka grisur Kuranin, librin e shenjtë të fesë Islame.

Zëdhënësi i Policisë për rajonin e Prizrenit, Shaqir Bytyqi, ka sqaruar për Dukagjinin se i dyshuari nuk është arrestuar. 

Megjithatë, ndaj tij është iniciuar një rast për veprën penale “nxitje e urrejtjes, përçarjes ose mosdurimit kombëtar, racor, fetar apo etnik”.

Policia ka njoftuar edhe prokurorin e shtetit, i cili do të vendosë për hapat e mëtejshëm. 

“Njësitet policore kanë ndërmarrë të gjitha veprimet e nevojshme dhe rasti është duke u hetuar”, thuhet në raportin zyrtar të Policisë.

Ngjarja ka ndodhur më 3 mars 2025, rreth orës 12:10 në Prizren. 

Ende nuk dihen motivet e personit të dyshuar dhe as masat që do të merren ndaj tij.