Policia në rajonin e Gjilanit ka njoftuar se ka shtuar praninë e zyrtarëve policorë në shkolla dhe përreth ambienteve të tyre, me qëllim zhvillimin normal të procesit mësimor në shkolla dhe sigurinë në trafik afër shkollave.
Në kuadër të kësaj, policia ka hartuar planin operacional ,,Siguria në shkolla’’, plan i cili parashikon hapa konkret për të garantuar një mjedis të sigurt për të gjithë nxënësit, mësimdhënësit dhe stafin e shkollës, duke përfshirë bashkëpunimin e policisë dhe angazhimin e komunitetit shkollor.
“Me këtë rast është planifikuar që në të gjitha shkollat dhe përreth ambienteve të tyre të ketë prezencë të shtuar të policisë, me qëllim parandalimin e çdo akti të mundshëm kriminal”, thuhet në njoftim.
Gjithashtu janë përcaktuar masa për implementim të projekteve dhe fushatave vetëdijësuese, me qëllim të parandalimit të dukurive negative dhe rritjes së nivelit të sigurisë në ambientet shkollore.
Drejtoria rajonale e Policisë Gjilan uron të gjithë personelin mësimor, nxënësit dhe prindërit për fillimin e vitit të ri shkollor.