Presidenti i Libanit, Joseph Aoun, ka deklaruar se negociatat e ardhshme me Izraelin janë të ndara nga bisedimet mes Shteteve të Bashkuara të Amerikës dhe Iranit, apo çdo proces tjetër negociues.
Në një deklaratë në platformën X, Aoun bëri të ditur se Libani do të përfaqësohet nga një delegacion i udhëhequr nga Simon Karam, ish-ambasador i Libanit në SHBA, duke theksuar se askush tjetër nuk do ta zëvendësojë atë në këtë mision.
Sipas tij, objektivat e bisedimeve janë ndalimi i veprimeve armiqësore, përfundimi i “okupimit izraelit” në jug të Libanit dhe vendosja e ushtrisë libaneze deri në kufijtë jugorë të njohur ndërkombëtarisht.
Aoun shtoi se presidenti amerikan Donald Trump ka shprehur mirëkuptim për kërkesat e Libanit dhe ka ndihmuar në organizimin e negociatave.
“Jam plot shpresë se do të arrijmë ta shpëtojmë Libanin”, deklaroi ai.
Ndërkohë, pavarësisht armëpushimit të shpallur, kryeministri izraelit Benjamin Netanyahu ka thënë se trupat izraelite do të mbeten të vendosura deri në 10 kilometra brenda territorit jugor të Libanit.