Presidentja e Kosovës, Vjosa Osmani, ka folur pas takimit që zhvilloi në Vatikan me Papa Leonin e XIV, takim të cilin e cilësoi si jashtëzakonisht të rëndësishëm dhe me përmbajtje të thellë për marrëdhëniet mes Kosovës dhe Vatikanit.

Osmani tha se në këtë takim ka shprehur qartë shpresën dhe besimin e popullit të Kosovës që Selia e Shenjtë do ta njohë Republikën e Kosovës, duke theksuar se një vendim i tillë do të kishte ndikim të madh për vendin.

“Me shpresën se një vendim i tillë i njohjes nga Vatikani i njohjes nga ana e shenjtërisë së tij do të kontribuonte edhe në mirëqenien më të madhe, në suksesin më të madh të Kosovës”, ka deklaruar ajo.

Deklarimi e plotë:

Sapo përfundova një takim shumë përmbajtësor me Papa Leonin e XIV. Kjo është një ditë jashtëzakonisht e rëndësishme në relacionet mes Republikës së Kosovës dhe Vatikanit.

Në takim me shenjtërinë e tij, natyrisht që paraqita shpresën dhe besimin e gjithë popullit të Kosovës që Vatikani më në fund do të marrë vendimin e shumë pritur që ta njeh Republikën e Kosovës, që të njeh vuajtjet e gjata të popullit të Kosovës për të jetuar i lirë i pavarur dhe në demokraci.

Me shpresën se një vendim i tillë i njohjes nga Vatikani i njohjes nga ana e shenjtërisë së tij do të kontribuonte edhe në mirëqenien më të madhe, në suksesin më të madh të Kosovës të Dardanisë antike, një toke që i ka dhënë botës dhe Evropës. Jo vetëm Gjergj Kastriotin Skënderbeun heroin tonë kombëtar, i cili e ka mbrojtur portën e fundit të Evropës, por edhe Shën Terezën.

Shpresojmë shumë që tani të merret ky vendim i shumëpritur për popullin e Kosovës.