Presidentja e Kosovës, Vjosa Osmani, në Dejton zhvilloi një takim të rëndësishëm me delegacionin e Kongresit Amerikan, të kryesuar nga kongresisti Michael Turner, udhëheqës i delegacionit të Shteteve të Bashkuara në Asamblenë Parlamentare të NATO-s.
Në këtë takim, ku morën pjesë edhe kongresistët Brett Guthrie, Linda Sánchez dhe Joe Wilson, u diskutuan mënyrat konkrete për thellimin e bashkëpunimit ndërmjet Kosovës dhe aleatit të saj strategjik, SHBA-së.
Presidentja Osmani theksoi rëndësinë e bashkëpunimit në fushat e mbrojtjes dhe zhvillimit ekonomik, duke falënderuar përkrahjen e vazhdueshme amerikane në çdo fazë të zhvillimit të vendit.
“Bashkë me kongresistët diskutova për mënyrat konkrete për ta thelluar më tej bashkëpunimin me aleatin kryesor të popullit të Kosovës, sidomos në fushat e mbrojtjes dhe zhvillimit ekonomik”, ka shkruar Osmani në Facebook.
Tutje ajo ka shprehur mirënjohje të thellë për përkrahjen e SHBA-ve, duke theksuar se kjo mbështetje është kyçe për sigurinë, demokracinë dhe integrimin euroatlantik të Kosovës.